మృతిచెందిన ఆర్టీసీ డ్రైవర్ కుమారుడికి ఉద్యోగం.. కుటుంబానికి అండగా రూ.కోటి సాయం!

నర్సంపేటకు చెందిన ఆర్టీసీ డ్రైవర్ శంకర్ గౌడ్ మృతి నేపథ్యంలో ఆయన కుటుంబానికి తెలంగాణ ప్రభుత్వం, ఆర్టీసీ ఉద్యోగులు అండగా నిలిచారు. శంకర్ గౌడ్ కుమారుడు హేమంత్ గౌడ్‌కు ఆర్టీసీలో రికార్డ్ ట్రెజరర్ ఉద్యోగ నియామక పత్రాన్ని రవాణా శాఖ మంత్రి పొన్నం ప్రభాకర్, టీజీఎస్ఆర్టీసీ ఎండీ నాగిరెడ్డి అందజేశారు.

బాధిత కుటుంబానికి ప్రభుత్వం ఆర్థిక సహాయం అందించగా, ఆర్టీసీ ఉద్యోగులు తమ ఒకరోజు వేతనం నుంచి సుమారు రూ.కోటి సమకూర్చారు.

ఆర్టీసీ సిబ్బందిపై దాడులకు పాల్పడితే కఠిన చర్యలు తప్పవని మంత్రి హెచ్చరించారు. మహిళల ఉచిత బస్సు ప్రయాణ పథకంతో పెరిగిన రద్దీకి అనుగుణంగా కొత్త బస్సులు కొనుగోలు చేస్తామని, బస్టాండ్లను ఆధునీకరిస్తామని వెల్లడించారు.