పూజ దీపం కిందపడటంతో ఇంట్లో మంటలు..

సిద్దిపేట జిల్లా తొగుట మండలం తుక్కాపూర్‌లో అగ్ని ప్రమాదం చోటుచేసుకుంది.ఇంట్లో వెలిగించిన పూజ దీపం ప్రమాదవశాత్తు కిందపడటంతో మంటలు చెలరేగి ఇంట్లోని వస్తువులు దగ్ధమయ్యాయి. ప్రమాద సమయంలో ఇంట్లో ఎవరూ లేకపోవడంతో పెను ప్రమాదం తప్పింది.

వివరాల్లోకి వెళితే..తుక్కాపూర్ గ్రామానికి చెందిన చిక్కుడు నారాయణ అనే వ్యక్తి ఇంట్లో నిత్యం మాదిరిగానే పూజ నిర్వహించి దీపం వెలిగించారు. ఈ క్రమంలో ప్రమాదవశాత్తు పూజ దీపం కిందపడటంతో సమీపంలోని వస్తువులకు మంటలు అంటుకున్నాయి. క్రమంగా మంటలు వ్యాపించి ఇంట్లోని సామగ్రిని చుట్టుముట్టాయి. మంటల తీవ్రతకు ఇంట్లో ఉన్న నిత్యావసర వస్తువులు, నగదు, విలువైన సామగ్రి పూర్తిగా కాలిపోయినట్లు సమాచారం.

అయితే అగ్ని ప్రమాదం జరిగిన సమయంలో ఇంట్లో కుటుంబ సభ్యులు ఎవరూ లేకపోవడంతో ప్రాణనష్టం తప్పింది. సమాచారం అందుకున్న స్థానికులు అప్రమత్తమై మంటలను అదుపు చేసేందుకు ప్రయత్నించారు. ఈ ఘటనతో బాధిత కుటుంబానికి తీవ్ర ఆస్తినష్టం వాటిల్లింది. కష్టపడి సంపాదించుకున్న వస్తువులు కళ్లముందే అగ్నికి ఆహుతి కావడంతో బాధితులు ఆవేదన వ్యక్తం చేస్తున్నారు.